Türkiyədən daha 50 həkim əsgərlərimizə xidmət üçün Azərbaycana gəldi - Foto

 Türkiyədən daha 50 həkim əsgərlərimizə xidmət üçün Azərbaycana gəldi -  Foto
Türkiyə Respublikasında fəaliyyət göstərən “Azərbaycanlı Həkimlər Dərnəyi”nin təşəbbüsü və Azərbaycan Respublikasının Türkiyədəki Səfirliyi və Tibbi Ərazi Bölmələrini İdarəetmə Birliyinin təşkilatçılığı, Heydər Əliyev Fondunun dəstəyi ilə Türkiyədə çalışan və təhsil alan 50 nəfərə qədər azərbaycanlı tibb mütəxəssisi ölkəmizin ərazi bütövlüyünün bərpa edilməsi naminə gedən döyüşlərdə yaralanan əsgərlərimizin müalicə prosesində könüllü tibbi xidmət göstərmək məqsədilə ölkəmizə gəlib.

Bu barədə Tibbi Ərazi Bölmələrini İdarəetmə Birliyindən (TƏBİB) Respekt.az-a verilən məlumatda bildirilib.

Həmçinin qeyd edilib ki, mütəxəssislər özləri ilə müxtəlif tibbi vasitələr gətirərək, TƏBİB-ə təhvil veriblər.

Rəsmi məlumata görə, oktyabrın 12-də TƏBİB İdarə Heyətinin sədri və məsul əməkdaşları həkimlərlə görüşüb, onları Vətəndə görməkdən məmnunluqlarını ifadə ediblər.

İdarə Heyətinin sədri Ramin Bayramlı çıxış edərək bildirib ki, Azərbaycan ordusunun qazandığı qələbələr ölkə Prezidenti İlham Əliyevin rəhbərliyi ilə Azərbaycanın prinsipial mövqeyindən bir addım da geri çəkilmədiyini, öz ərazi bütövlüyünü bərpa etmək əzmində və gücündə olduğunu bir daha sübuta yetirib:

“Bu tarixi qələbə yalnız ölkəmizin vətəndaşlarını deyil, dünyanın dörd bir yanında yaşayan həmvətənlərimizi səmimi qəlbdən sevindirir. Təsadüfi deyil ki, Türkiyədə yaşayan həkimlərimiz də öz bilik və bacarıqları ilə Vətən müharibəsində yaralanan əsgərlərimizin sağlamlıqlarına qovuşmaları üçün əzmlə çalışacaqlar. Azərbaycanda tibbi personalın kifayət qədər olmasına baxmayaraq, Sizin bu gün Vətəndə olmaq istəyiniz bizi qürurlandırdı və bu nəcib təşəbbüsə görə hər birinizə dərin minnətdarlığımızı bildiririk”.

Sonda Türkiyədə çalışan azərbaycanlı həkimlər bu mübarizədə əsgərlərimizin sağlamlıqlarını qorumağın onların mənəvi borcu olduqlarını bildiriblər, yaradılan şəraitə görə Heydər Əliyev Fonduna təşəkkür ediblər.

Tibbi mütəxəssislərin TƏBİB-in tabeliyində olan müəssisələrdə xidmət göstərəcəkləri bildirilib.